தெலுங்கு மற்றும் இந்தி திரைப்படங்களில் வில்லன் கதாபாத்திரத்தில் நடித்து புகழ்பெற்ற நடிகர் ராமி ரெட்டி ஹைதராபாதில் இன்று காலமானார். அவருக்கு வயது 52. கடந்த சில வாரங்களாக சிறுநீரகக் கோளாறுக்காக சிகிச்சை பெற்று வந்த ராமி ரெட்டி செகந்திராபாதில் உள்ள தனியார் மருத்துவமனையில் இன்று காலை 11 மணியளவில் மரணமடைந்தார். அவருக்கு 2 மகள்கள், 1 மகன் உள்ளனர்.
அங்குசம் படத்தில் ராமி ரெட்டியின் கதாபாத்திரம் மிகவும் பிரபலமடைந்தது. தெலுங்கு, தமிழ், கன்னடம், இந்தி, மலையாளம் மற்றும் போஜ்புரி மொழிகளில் 250-க்கும் மேற்பட்ட படங்களில் அவர் நடித்துள்ளார்.
ஆந்திராவின் சித்தூர் மாவட்டத்தைச் சேர்ந்த ராமி ரெட்டி, திரையுலகில் நுழைவதற்கு முன்பு பத்திரிகையாளராக தனது பணியைத் தொடங்கினார்.
ராமி ரெட்டியின் திடீர் மறைவு திரைத்துறைக்கு பெரிய இழப்பு. அவர் ஒரு சிறந்த நடிகர் என நகைச்சுவை நடிகர் பிரம்மானந்தம் தெரிவித்தார்.
0 கருத்துகள்:
கருத்துரையிடுக